ബെംഗളൂരു: അമിതവേഗതയിൽ വരുന്ന ഭാരവാഹനങ്ങൾ നിയന്ത്രിക്കാൻ പോലീസിന് ബുദ്ധിമുട്ടായതിനാൽ രാത്രി 12 മുതൽ പുലർച്ചെ 5 വരെ പീന്യ മേൽപ്പാലത്തിലൂടെ ഭാരവാഹനങ്ങളുടെ ഗതാഗതം ബെംഗളൂരു ട്രാഫിക് പോലീസ് നിരോധിച്ചു. അറ്റകുറ്റപ്പണികൾ നടന്നുകൊണ്ടിരിക്കുന്ന മേൽപ്പാലം 2021 ഡിസംബർ 25 മുതൽ 2022 ഫെബ്രുവരി 15 വരെ അടച്ചിട്ടതിനാൽ പ്രദേശത്ത് വൻ ഗതാഗതക്കുരുക്ക് ഉണ്ടായിരുന്നു. തുടർന്ന് അറ്റകുറ്റപ്പണികൾ പൂർണമായി പൂർത്തീകരിച്ചില്ലെങ്കിലും ഗതാഗതം സുഗമമാക്കാൻ ചില ഭാരം കുറഞ്ഞ വാഹനങ്ങൾക്ക് മാത്രം മേൽപ്പാലം ഉപയോഗിക്കാൻ അനുമതി നൽകുകയായിരുന്നു.
പകൽ സമയത്ത് ഗതാഗതം നിയന്ത്രിക്കാനാകുമെങ്കിലും രാത്രിയിൽ ഹെവി മോട്ടോർ വാഹനങ്ങൾ വളരെ വേഗത്തിൽ നീങ്ങുന്നതിനാൽ ഇത് ബുദ്ധിമുട്ടുള്ള കാര്യമാണെന്ന് ബെംഗളൂരു ട്രാഫിക് പോലീസ് ഒരു പ്രസ്താവനയിൽ അറിയിച്ചു. ഹെവി വാഹനങ്ങൾ രാത്രിയിൽ അമിത വേഗത്തിൽ സഞ്ചരിക്കുന്നതിനാൽ സ്ഥലത്ത് വിന്യസിച്ചിരിക്കുന്ന പോലീസ് ഉദ്യോഗസ്ഥർക്കും അപകടസാധ്യതയുണ്ടെന്ന് കുറിപ്പിൽ കൂട്ടിച്ചേർക്കുന്നു. കൂടാതെ, ഈ വാഹനങ്ങൾ മേൽപ്പാലത്തിന്റെ മുകളിലേക്കും താഴേക്കുമുള്ള റാമ്പുകളിലെ ബാറുകളിൽ ഇടിച്ചതിനാൽ രണ്ട് ഗാൻട്രികൾക്ക് കേടുപാടുകൾ സംഭവിച്ചതായും പോലീസ് കുറിപ്പിൽ ചൂണ്ടിക്കാട്ടി. ഇത് തടയാൻ, ഹെവി മോട്ടോർ വാഹനങ്ങൾക്ക് പകൽ സമയത്ത് മേൽപ്പാലം ഉപയോഗിക്കാനാകുമെങ്കിലും, രാത്രി 12 നും 5 നും ഇടയിൽ മേൽപ്പാലത്തിലൂടെ സഞ്ചരിക്കാൻ നിരോധനം ഏർപ്പെടുത്തിയിരിക്കുന്നത്.
പുതിയ അറിയിപ്പ് കണക്കിലെടുത്ത് പോലീസ് ഗതാഗത വഴിതിരിച്ചുവിടലും ബദൽ റൂട്ടുകളും പുറപ്പെടുവിച്ചിട്ടുണ്ട്. ഹെവി മോട്ടോർ വാഹനങ്ങൾക്ക് കെന്നമെറ്റൽ ജംഗ്ഷനിൽ നിന്ന് എട്ടാം മൈൽ, ദാസറഹള്ളി, ജാലഹള്ളി ക്രോസ്, പീന്യ പോലീസ് സ്റ്റേഷൻ സർക്കിൾ വഴി ശ്രീ ശിവകുമാര സ്വാമിജി പാലം ജംഗ്ഷൻ വരെ സർവീസ് റോഡിലൂടെ എസ്ആർഎസ് ജംഗ്ഷൻ വഴി ഗോരഗുണ്ടെപാളയയിൽ എത്തിച്ചേരാം. ഗോരഗുണ്ടെപാളയയിൽ നിന്ന് എസ്ആർഎസ് ജംഗ്ഷനിലേക്ക് വരാൻ വാഹനങ്ങൾക്ക് സർവീസ് റോഡ് ഉപയോഗിച്ച് പീന്യ പോലീസ് സ്റ്റേഷൻ സർക്കിൾ, ജാലഹള്ളി ക്രോസ്, ദാസറഹള്ളി, എട്ടാം മൈൽ വഴി കടന്നുപോകാം. കൂടാതെ ഗോരെഗുണ്ടെപാളയ മേൽപ്പാലം വഴിയുള്ള വാഹനങ്ങൾക്ക് ഔട്ടർ റിംഗ് റോഡും (ഒആർആർ) തുംകുരുവിൽ നിന്ന് ബെംഗളൂരുവിലേക്ക് പ്രവേശിക്കുന്നവർക്ക് മടവര സൈഡിനടുത്തുള്ള നൈസ് റോഡും ഉപയോഗിക്കുന്നതിന് ക്രമീകരണം ചെയ്തിട്ടുണ്ട്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button.
